Fi'l-asl Arabkir ahalisinden olub Medine-i Antakya kazasında vaki olan Alakend karyesinde sakin iken bundan akdem vefat iden el-hac Ali bin Mahmud bin Abdullah'ın veraseti Haleb'de sakin zevce-i menkûha-i metrûkesi Ayşe binti Mehmed ile ammisi oğl Ahmed ibni Ebu Bekir bin Abdullah'na münhasıra olduğu lede's-şer' zâhir ve nümâyân oldukdan sonra tereke-i müteveffâ-yı mezbûrı ahz ve kabz ve taraflarına isâle mezbûrân Ayşe ve Ahmed taraflarından bâ-huccet vekaleti sâbit olan mezbur Ahmed'in oğlı Es-Seyyid İbrahim Ağa meclis-i şer'i şerif-i enverde Medine-i mezbure mahallâtından Önciler Mahallesi sakinlerinden işbu bâisü'l-kitab Kara Ali Ağa bin Resul mahzarında bi'l-vekale bi tav'an ikrar-ı tam ve takrir-i kelam idüb Medine-i mezbureye tabi karye-i Fatkiye'de vaki büyût-ı adîdeyi hâvi bir bâb çiftlik mea timurci (?...) ve bir kıta üzüm bağı ve on dokuz eşcar-ı zeytun ve bir kıta harabe-muşrif incirlik ve bir kıta harabe-muşrif tut bağçesi ve beş eccar ceviz ve bir bâb değirmenin nısf hisse-i şâyiası ilâ vefat müteveffâ-yı mezburun mülki ba'de vefatihi verese-i mezbûruna isabet ve intikal itmekle yine emlak-ı mezbûrları ba safka-i vâhide iki yüz elli guruşa bi'l-vekâle mezbûr Ali Ağa'ya bey'-i sahih-i şer'iye ile bey' ve teslim idüb ol dahi ber-vech-i muharrer iştirâ ve kabz ve kabul itdikden sonra karye-i mezbûre toprağında ve kurb ve civarında vaki mezralarda malûmü'l-hudûd sekiz kıta tarlaların hakk-ı tasarruflarını dahi elli guruş bedel mukabili merkum Ali Ağa'ya ferağ ve
tefviz eylediğimde ol dahi ber-vech-i muharrer iştira be temellük ve tesellüm ve tefevvüz ve kabul idüb semen-i mezkûr ve bedel-i merkumdan müctemi' olan üç yüz guruşı merkum Ali Ağa yedinden bi'l-vekâle bi't-tamam ve bi'l-ikmâl ahz ve kabz eyledim fi mâ ba'de mezbure ve oğlu bağı ve incirlik ve tut bağçesi ve zeytun ve ceviz aşcarları ve nısf-ı değirmende ve sekiz kıta tarlaların hakk-ı tasarruflarında mütekkilerinin asla ve kat'â alaka ve medhalleri kalmayub merkum Ali Ağanın mülk-i müşterâsı ve hakk-ı müfevvizidir keyfe mâ-yeşâ' yehtâr ve mülkiyet üzre mutasarrıf olsun didikde gibbe't-tasdîkü'ş-şer'i bi't-taleb ketb olundı hurire fi el-yevmü's-sâmin min şehr-i zi'l-kade-i şerife li sene tis'în ve mie ve elf Şuhûdü'l-hâl Harem Nâibi el-Hâc Halil Efendi Osman Beşe bin Yusuf Diğer Osman Beşe bin Mehmed Beşe Halil Beşe Ordi Ağasızâde Yahya Ağa Mukayyed Halil Efendi Kâtib Mustafa Efendi Sermahzarân el-hâc Abdullah ve gayrühüm el-hâzırûn